Hiztegi honek osasunari buruz hitz egiteko balio duten hitzak ditu, alfabeto-hurrenkeran, haiei dagozkien azalpenak marrazkiekin, zenbait hitz nola eratu diren ulertzeko azalpenak, hiztegiko hitzen arteko loturak edo erabiltzen ditugun testuinguruari buruzko informazioa. Atlas bat ere badu, giza gorputzari buruzko 8 irudirekin, eta han beste termino batzuk azaltzen dira; jarduera interaktiboak ere baditu, hiztegia modu dibertigarrian araka dezazun.

Hitz bakoitzean, esanahiari buruzko azalpena (zer den, nolakoa den, zertarako erabiltzen den, nork erabiltzen duen eta abar) ematen zaizu, baita haur batek egindako marrazki bat ere, hitz bakoitzaren esanahia argiago ulertzen laguntzeko. Zenbait kasutan, bestelako informazioak ere ematen dira, jakiteko zer komunikazio-egoeratan erabiltzen dugun termino bat (adibidez, lipotimiari buruz, “Herri-hizkeran, zorabio erabiltzen dugu” esaten da, edo, eztarriko minari buruz, “Eztarriko mina infekzio batek eragiten duenean, medikuek amigdalitis hitza erabiltzen dute; amigdalitis termino espezializatua da”) edo nondik datorren hitz bat (esate baterako, otitisari buruz, hala esaten da: “Antzinako grezierako ot- ‘belarria’ eta -itis ‘hantura’ elkartuta eratzen da”). Beste batzuetan, helburua da errealitate jakin batzuei buruz izan ditzakegun eta benetakoak ez diren ideiak desegitea (adibidez, Down-en sindromean ohartarazten da ez dela gaixotasun bat, edo gainpisua eta obesitatea ez direla nahastu behar).

Hitz bat modu batean baino gehiagotan esan badaiteke, denak jasotzen dira, eta azaltzen da zer kasutan erabiltzen den haietako bakoitza; adibidez, ubeldura eta hematoma edo zefalea eta buruko mina. Esanahiari buruzko azalpena hitz batean bakarrik ematen da; hitz hori medikuek erabiltzen duten hitza izaten da, eta gainerako hitzetan termino horretara bideratzen da (adibidez, “buruko min” sarreran, “Ikus zefalea” jartzen du).

Azalpen guztietan urdin ilunez markatzen dira hiztegiko beste lekuren batean ere azalduta dauden hitzak, eta lilaz, atlaseko marrazkiren batean daudenak.

Aditu horiek hizkuntza ulergarri batean landu dituzte definizioak, eta, askotan, ikasleek haurren definizioetan erabili dituzten hitzak erabili dituzte. Gainera, definizioetan erabiltzen diren medikuntzako hitz espezializatu guztiak ere azalduta daude hiztegian, edo atlasean adierazita; batzuetan, hitz baten esanahia definizioaren barruan eman da (adibidez, farmazia hitzaren barruan parafarmazia ere definitu da). Adituek zuri zuzendutako esaldiak dituen definizio-eredu bat erabili dute. Batzuetan informazioa gehitu dute ikasleen azalpenetan hauteman dituzten gaizki-ulertuak saihesteko, eta, hala, kasu askotan, informazio osagarriak helburu didaktikoa du. Definizio bakoitzarentzat, adituek marrazki bat edo bi aukeratu dituzte.

Gainera, Annexa Joan Puigbert ikastetxeko seigarren mailako Naia Oliver ikasleari eskatu genion giza gorputzaren atlaserako marrazkiak eta botika-kutxa batenak egin zitzala, medikuntzari buruzko oinarrizko terminoak modu bisualean osatu ahal izateko.

Orokorrean, uste dugu hiztegi original bat eskaintzen dizugula; izan ere, Lehen Hezkuntzako haurren beharretara egokitua dago, 8-10 urteko haurren ezagutza oinarri hartuta egin da, eta, gainera, gai batean espezializatutako eskola-hiztegi bat da.

Nire eskerrik beroenak M. Teresa Cabréri; haren maisutasunak eraman ninduen bere Terminologiaren Komunikazio Teorian proposatzen zuen Egokitze Printzipioa errespetatzeko gai izango zen lan bat planteatzera eskola-lexikografia espezializatuan. Hori erronka metodologiko garrantzitsua izan zen Mi primer diccionario de ciencia lana sortzeko, baita Primer diccionario de medicina ilustrado lana egiteko ere.

Hizkuntzalari adituen taldea honako kide hauek osatu dute:

Mariona Arnau, Aida Celemín, Nuria Clapés, Julia Flores, Laura Llort, Marina Maimó, Lidia Ramos, Marta Roviralta, Carla Solé, Claudia Tarrago, Yingfeng Xu, ikasleak eta proiektuko kolaboratzaile aktiboak. Eskerrak eman nahi dizkiet definizioak aukeratzen, automatizatzen eta idazten jarri duten interesagatik. Hasiberriak ziren ikerketaren esparruan, eta trebetasun eta bizitasun handiz egin dute.

Mila esker Jorge M. Porras-Garzóni eta Laia Vidal-Sabanési, gogo biziz hartu baitute parte automatizazio-taldea dinamizatzen, datuak prozesatu dituzte, baita definizioak egin ere. Haiek izan dira proiektuaren eragile nagusietako batzuk.

Silvia Llachi eta Silvia Grisóri, definizioen hizkuntza-berrikuspena egin baitute, begirada kritiko eta adituarekin. Ona Doménechi, material guztien azken irakurketan parte hartu baitu eta zentzuzko aholkuak eman baititu. Hartu ditugun erabakietako batzuetan, haren gomendio burutsuei jarraitu diegu.